У склад дэлегацыі ўваходзяць тры міністры, яны знаходзяцца на борце прэзыдэнцкага самалёта.
У перамовах з Расеяй возьмуць удзел дзяржаўны сакратар Марка Рубіё, міністар фінансаў Скот Бэсэнт, міністар гандлю Говард Лутнік.
Перамоўшчыкаў на борце суправаджаюць дырэктар ЦРУ Джон Рэткліф, спэцпасланьнік прэзыдэнта Стыў Уіткаф і іншыя члены яго каманды.
Перад вылетам Трамп напісаў у сацыяльнай сетцы Truth паведамленьне: «СТАЎКІ ВЫСОКІЯ». Інфармацыйныя агенцтвы перадаюць ягоныя заявы, зробленыя на борце прэзыдэнцкага самалёта.
Ён заявіў, што сустрэча з Пуціным можа мець «сур’ёзныя наступствы». Паводле ягоных слоў, ён абмяркуе з ім тэрытарыяльныя пытаньні, зьвязаныя з вайной, але канчатковае рашэньне па іх будзе прымаць Украіна.
Трамп прыбудзе на Аляску прыблізна за гадзіну да пачатку саміту, вынікае з раскладу мерапрыемства. Ён плянуе асабіста сустрэць Пуціна, паведаміў губэрнатар Аляскі Майк Данліві.
ГЛЯДЗІЦЕ ТАКСАМА: 5 фактаў, якія трэба ведаць перад самітам Трампа і ПуцінаЗ расейскага боку, акрамя Пуціна, на Аляску прыбудуць міністар замежных спраў Сяргей Лаўроў, памочнік прэзыдэнта Юрый Ушакоў, міністар абароны Андрэй Белавусаў, міністар фінансаў Антон Сілуанаў і спэцыяльны прадстаўнік прэзыдэнта Расеі Кірыл Дзьмітрыеў.
Аналітыкі Амэрыканскага інстытута вывучэньня вайны (ISW) лічаць, што ўключэньне Масквой Сілуанава і Дзьмітрыева ў склад дэлегацыі сьведчыць аб тым, што Расея, верагодна, паспрабуе пераключыць увагу саміту з вайны ва Ўкраіне на патэнцыйныя двухбаковыя эканамічныя пагадненьні.
Саміт Трампа і Пуціна ў найбуйнейшым горадзе Аляскі Анкорыджы стане першай сустрэчай паміж расейскім лідэрам і дзеючым прэзыдэнтам ЗША з 2021 года. Чакаецца, што саміт пачнецца, а 11:00 па мясцовым часе (22:00 па менскім часе) і адбудзецца на ваеннай базе Эльмендорф-Рычардсан.
Ад Клінтана да Трампа: саміт на Алясцы стане 49-й сустрэчай Пуціна з прэзыдэнтам ЗША