Сёлета павышэньня аплаты за навучаньне ва ўнівэрсытэтах не плянуюць. Акрамя таго, у лістападзе будзе дадатковы набор людзей у сельскагаспадарчыя вну. Там кіраўніцтва Міністэрства адукацыі і вну спадзяюцца залічыць каля 2,4 тысяч чалавек на завочнай форме навучаньня.
Начальнік галоўнага ўпраўленьня прафэсійнай адукацыі Міністэрства адукацыі Сяргей Пішчоў адзначыў, што сёлета аб’явілі дадатковы набор толькі ў трох унівэрсытэтах — Віцебскай дзяржаўнай акадэміі вэтэрынарнай мэдыцыны, Беларускай дзяржаўнай сельгасакадэміі ў Горках і Беларускім дзяржаўным універсітэце транспарту ў Гомлі.
Аляксандар Бахановіч, першы намесьнік міністра адукацыі, падкрэсьліў, што амаль кожны пяты бюджэтнік — мэтавік. Плян прыёму ў гэтую ўступную кампанію выканалі амаль на 100%.
Кожны чацьвёрты з тых, хто паступіў, будзе вучыцца на інжынэрных спэцыяльнасьцях. У Беларускім нацыянальным тэхнічным унівэрсытэце на некалькі дзесяткаў падрасьлі прахадныя балы на спэцыяльнасьці, зьвязаныя з мэтралёгіяй, будаўніцтвам, энэргетыкай.
Кожны дзесяты абітурыент паступіў на спэцыяльнасьці ў сельскай гаспадарцы, мэдыцыне і на пэдагагічныя факультэты. На пэдагагічныя спэцыяльнасьці адбыўся рэкордны набор — каля 4 тыс. чалавек. А каля 3 тысяч паступілі на сельскагаспадарчыя.
У 21 унівэрсытэт залічылі больш як 500 пераможцаў унівэрсытэцкіх алімпіядаў. Гэтая лічба сёлета вышэй на 30% у параўнаньні зь леташнім пэрыядам.
Сёлета Міністэрства адукацыі змагалася супраць чэргаў і тлумаў у калідорах, таму ўвяло электронную чаргу. Новую паслугу гэтым летам ужо выкарысталі каля 15 тысяч абітурыентаў.
Форум